المغرب يوشك على استرجاع سبتة ومليلية

 المغرب يوشك على استرجاع سبتة ومليلية

 لمغرب قام بالعديد من لمحاولات والدليل على هذا وهو ان المولى اسماعيل ( 2) للي كان حاكم لمغرب في لأواخر ديال القرن 16 الى بداية القرن 17 قام بالعديد من لهجمات على لمستعمر لإسباني فسبيل انه يحرر سبتة ومليلية ولكن لمسألة للي بقات مترسخة في التاريخ وهو لحصار للي قام بيه وللي كان مطوق بيه جميع لأطراف ديال سبتة استمر هاد لحصار لمدة 26 سنة وفي لمقابل محمد بن عبد الله بن لمولى اسماعيل للي كان بدورو محاصر مليلية ولكن لمسألة للي خلاتو يتراجع وهي عقد الصلح للي دار مع لإسبان ولكن هذا مكيعنيش انه تنازل على مليلية وانما وقفو النزاعات ولحروب للي كانت بينهم ولكن ايلا رجعنا للسلطان اسماعيل كان دائما كيراودو واحد لحلم او واحد لهدف وهو انه يحرر كل رقعة محتلة في لمغرب بحيت فهديك لمدة بالضبط كانو بزاف ديال الدول لغربية كيحاولو يستعمرو لمغرب ولكن لمولى اسماعيل كاين كيشكل ليهم واحد لعائق

اما بالنسبة لاسبانيا يعني كان كيدير للي فجهدو باش يمنع هاد لمستعمر من انه يسيطر على هاد لمدينة فلما سلات لفترة ديال لحكم ديالو جا الدور ديال لمجاهدين لمرابطين ( 3) للي حتاهوما استمرو على هاد لحال لمدة 26 سنة ولكن للأسف كاع هاد لمحاولات تخللات بالفشل بحيت لإسبان كانو قوى من لمغرب فيما يخص لأسلحة ولعتاد وما الى دلك ولكن لخطأ للي دار السلطان محمد بن عبد الله لما عقد يعني واحد لهدنة مع اسبانيا كان كيظن ان هاد لهدنة كتخص غير لبحر بحيت هوما كانو بينهم حروب على مستوى البحر ولكن المفاجأة للي وقعات هي انه داك لعقد كانت فيه هدنة على مستوى البر والبحر شنو كيعني هذا ؟ يعني توقف جميع اشكال النزاعات فيما بينهم وبطيعة لحال بما ان اسبانيا هي للي كانت مسيطرة انذاك هاد لمدينتين فبقات على هاد لحال ليومنا هذا

دبا من بعد مجوبنا على السؤال لأول نتاقلو للسؤال التاني للي كيقول شناهي لأشياء للي لمغرب كيستعد انه يقوم بيها بخصوص هاد لمسألة. من بين هاد لأشياء للي كيقوم بيها وهي غير مؤخرا خرج سعد الدين لعتماني بواحد التصريح كيقول فيه بانه وصل لوقت باش يسترجع فيه لمغرب لأراضي ديالو( 4) هاد التصريح ديال لعتماني لقى اقبال كبير من بعض لأحزاب السياسية للي منهم حزب الاستقلال وللي كان صاحب هاد لكلمة هو نور الدين مضيان رئيس لكتلة النيابية لحزب الاستقلال يعني كخلاصة للتصريح للي جا بيه كيقول انه ولابد نفتحو لملفات لقديمة للي عندنا مع اسبانيا بخصوص سبتة ومليلية يعني المغرب غادي يبدل النهج والاستراتيجية ديالو وبأسلوب للي هو متزن يعني تكون حوارات ومناقشات بشكل سلمي او غيغير التكتيك ديالو ادا دعات الضرورة يعني ايلا كانت ردة فعل اسبانية عدائية فحتى لمغرب غيتعامل معاها بنفس النهج ديالها وايلا لاحظتو مؤخرا ان اولى لخطوات للي استعملها لمغرب وهي لما سمح للمهاجرين بعبور لحدود او ربما نقدرو نعتبرو هاد لمسألة هي للي زادت اكدت لينا انه فعلا غتكون بعض لأمور لإيجابية في لمستقبل بخصوص هاد لمدينتين

لأنه لمغرب كيستعمل واحد التكتيك او واحد لخطة للي دكية وهي انه كيحاول يخنق لإقتصاد ديال هاد لمدينتين ( 5) بحيت لمغرب كيتعتابر هو لمساهم لأكبر في لإثتصاد ديالهم وحتى واحد لمسألة مهمة وهي لما ظهر فيروس كورونا فاش تقريبا تضطرات كاع دول لعالم انها تغلق لحدود ديالها هاد لمسألة كانت كطبق من طهب بالنسبة للمغرب يعني لمغرب ستغل هاد لفرصة باش يخنق لإقتصاد ديال سبتة ومليلية ولكن هادشي طبعا كيتم بشكل غير مباشر يعني مكيبينش لإسبانيا انه متعمد يدير هاد المسألة

وطبعا هاد لخطة للي استعملها لمغرب كانت ناجحة وعطات لمفعول ديالها يعني استاطع انه يخنق اسبانيا بلا ميكتارت للنتائج ديال هاد لأمر بحيت راه كانت مزال بعض الخطوط البحرية مفتوحة مع دول اخرى بحال فرنسا وإيطاليا ( 6) يعني فهاد لحالة اسبانية هي لمتضررة يعني لمغرب كيحاول بعض الرسائل لإسبانيا بللي لفترة ديال سيطرتها على هاد المدينتين سالات وباش تعرفو لخبت ديال اسبانيا رغم ان هاد لمدينتين كاينين في الراب لوطني كتمنع اي شخص مغربي من انه يدخل تما بدون تأشيرة يعني هدا كيبين حقيقة هاد الدولة لخبيتة يعني هاد لمسألة كتخلي كل مغربي يحس بنوع من الظلم او لإهانة ( 7)

ولكن هاد لأمر كنظن انه مغيستمرش لفترة طويلة بحيت راه لمغرب بدا كيبدل واحد شوي ديال لمجهود بخصوص هاد لقضية وحتى الشعب لمغربي مبقاش راضي على هاد الظلم واصلا معمرو كان راضي ولكن كيف كيقول المتل ما باليد حيلة يعني هاد لمتل كينطابق علينا بحيت منقدروش نغيرو هاد لواقع ب لأيدي ديالنا ولكن هذا مكيمنعش اننا منقدرو نديرو حتى شي حاجة بل يمكن لينا نديرو واحد التغيير للي هو كبير غير بمجرد استعمالنا لألسنة ديالنا وطبعا هذا من خلال لمظاهرات ولإحتجاجات ( 8) لأنه شحال من واقع للي غير مناسب ممكن انه يتغير من خلال واحد لوقفة جماعية كتندد او كتطالب بالتغيير فلابد مغيكون موراها شي تغيير يعني هاد لمسألة جد مهمة بالإضافة لكل هذا ظهرات واحد المنظمة كتطالب الدول العربية وحتى الافريقية باش انهم يدعمو المغرب فسبيل انه ينهي الاحتلال الاسباني السيطرة ديالو على هاد لمدينتين لمغربيتين هاد المنظمة للي تكلمنا عليها دبا هي منظمة العدل والتنمية بالنسبة لمجال العمل ديالها كتهتم بدراسات الشرق الاوسط وشمال افريقيا يعني حتى هاد المنظمة كيبان ليهم بان اسبانيا محتلة أراضي للي ماشي ديالها يعني غصبا عن لمغرب وحتى هوما بدورهم كيوقفو ضد لأطماع ديال اسبانيا وكيأكدو عليها بانها خاص ولابد تنساحب من تما وتعطي لحق للمغرب بانه يسترجع لمدن للي هي في لأصل ملكو رغم انه كاين واحد لعائق اخر وهو ان الامم لمتحدة مزال لحد ساعة مكتعترفش بان اسبانيا محتلة هاد لمناطق للي ربما هذا حتا هو عامل مهم فكون اسبانيا متشبتة بسيطرتها على هاد لأراضي

هنا طبعا مورا هاد التصريحات لمتتالية ديال رئيس لحكومة وحتى لمظاهرات ديال الشعب لمغربي بالاظافة لهاد الدول للي كتساند لمغرب فهاد لمسألة هذا ميمكن ليه الا يوتر اسبانيا بل انها غتحسن بنوع من القلق وحتى الغضب يعني تخلطو عندها لأحاسيس بحيت كانت كتظن بان لمغرب نسا هاد لمسألة ولكن بحال هاد لأياء مكيتنساوش لأنه اصلا لمغرب مسبق ليه ليه وقع حتى شي التزام مع اسبانيا كيقول فيه انه تنازل على هاد لأراضي ولكن اسبانيا محتلاهم بالقوة. فكيما قلنا اسبانيا مورا هاد التصريحات شعرات بنوع من لقلق وحتى لغضب وبدات كتدير تحركات فورية وللي أولها استدعاءها للسفيرة المغربية كريمة بنيعيش ( 9) للي كتواجد فمدريد يعني طلبو منها توضيحات بخصوص تصريحات لعتماني بحيت كيما قلنا هاد التصريحات مكانوش كيتوقعوها نهائيا يعني نزلات عليهم بحال الصاعقة

وهنا بطبيعة لحال غيبداو بعض لأحزاب ولحركات ليمينية لإسبانية كيحرضو لحكومة لإسبانية باش يكون شي رد عنيف على هاد التصريحات يعني هوما مزال كيظنو انهم غيقدرو يخلو لمغرب يحس بالخوف وينساحب من هاد لقضية ولكن كيف كنقولو باللغة لعربية تلك الايام ولت يعني داكشي كان في لماضي اما دبا واقع اخر يعني لمغرب كيأكد على انه غيتوضع حد لهاد الطغيان ديال اسبانيا فأقرب وقت ولكن اسبانيا عندها رأي مختالف بحيت كيبانلها انه ميمكنش تتفاوض على هاد لمنطقتين للي كتعتابرهم ديالها يعني كتحاول تغطي على الخبت ديالها رغم ان كاع كتب التاريخ كيأكدو على انها محتلة هاد لمنطقتين مند سنين. إذا كخلاصة كاين ربما جوج ديال لعوامل للي ممكن يحسمو فهاد لمسألة العامل لأول وهو لوقت يعني ربما فيوم من لأيان تتنازل اسبانيا على هاد لقضية او مسألة او عامل تغير الظروف الجيوسياسية . شنو كيعني هذا؟ يعني خلال هاد السنوات لقليلة للي ماجية غيكون لعدد ديال السكان لمغاربة للي كيعيشو تما ( 10 ) أكتر بكتير من لإسبان بنفسهم وهاد المسألة كتأكدها إحصائيات اسبانية بحيت أعداد السكان المغاربة فتزايد مستمر وللي كيوصفو بانه مهول گاع بينما أعداد السكان الاسبان فتناقص يعني كنظن ان هاد لعامل لأخير هو للي غيحسم فهاد لمسألة بحيت لما يصبح السكان المغاربة اكتر بكتير من الاسبان هنا غتتبدل الامور